(Chamorro sermon excerpts from the late Pale' Lee Friel, OFM Cap)
I mina' tres na tinago' Yu'us ha tåtågo' hit na u ta guåtda, u ta na' såntos i Ha'ånen i Saina. I Hudios siha ginen ha na' såsåntos i Sabalo na ha'åne lao pot i kumahulo' i Saina-ta ginen i entalo' i man måtai gi Damenggo na ha'åne ya i Espiritu Sånto tumunok gi hilo' i Iglesia gi Damenggon Pentekostes, i Iglesia Katolika ha guåguåtda i Damenggo komo ha'ånen i Saina. Fine'nana, man ma tåtågo hit na u ta asiste i Sånta Misa an Damenggo yan todo Såntos na Ha'ånen Obligasion. Yanggen atrasao hao pot gago' pat deskuido, ya måtto hao guato gi Misa despues di måkpo i setmon, umisao hao makkat. Yanggen gumai mayulang i karetå-mo pat gumuaha måtmo na uchan ya pot ennao mina' umatrasao hao guato gi Misa, tåya' ni håfa isao-mo. Guåha nai kumåte i patgon pat mumalångo durånte i Misa ya i tata pat i nana ha na' huyong gi Gima'yu'us. Masea sumåga hao gi sanhiyong diddidi' tiempo, humosme hao ha' Misa. Ti obligao hao na un hosme otro Misa. Yanggen malingo maigo'-mo durånte entero i Misa, ti humosme hao ya debe di un asiste otro Misa.
No comments:
Post a Comment