I LA TADDUNG NA FINO' CHAMORRO : FA' TAOTAO



bkchandler.wordpress.com

"Fa'taotao" kumekeilek-ña na para un respeta i otro taotao ya un aksepta gue' komo kabåles na taotao.  Lao et mås impottånte guiya i para un respeta i taotao.  I atlibes-ña i para un fa'ga'ga' i taotao, sa' kumekeilek-ña ennao i un chochonnek på'pa' i taotao.  Lao yanggen un fa'taotao i otro, un konsidedera gue' komo acha' taotao-mo, ya mungnga na un po'lo na takpapa'-ña gue' ke hago pat takkilo'-ña hao ke guiya.  Pues ennao mina' sumåsaonao guine i espiritun hinimitde.  Sa' yanggen ti humitde i taotao, siempre ha atan på'pa'.  Lao yanggen humitde i taotao, siempre ha atan todo i pumalo siha na taotågue komo parehu-ña yan achaiguå-ña.

Ti ta fafaisen i ga'ga' håfa malago'-ña para u kånno'.  Ta na' chochocho i ga'ga' håfa i siña ta nå'e pat håfa i malago'-ta para ta nå'e.  Lao yanggen para ta fa'taotao i otro taotao, siempre u ta faisen gue' håfa malago'-ña para u kånno'.  Yanggen un fa'ga'ga' i taotao, pues kumekeilek-ña na un na' parereho ha' i taotao yan i ga'ga', ya ti dinanche ennao, sa' hågo lokkue' taotao.  "Fa'taotao" kumekeilek-ña na ti para un tråta i taotao komo ga'ga'.  I taotao ti ha merese taiguihe na klåsen tratamiento sa' åhe' ti ga'ga' gue', na taotao, pareho ha' yan hågo.  Taimano i sinangån-ña i Saina-ta : Håfa i ti ya-mo na un ma cho'gue, cha'-mo chocho'gue gi prohimu-mo.