Thursday, July 28, 2011

I LA TADDUNG NA FINO' CHAMORRO : EMPAS


Fine'nana, ta atan i "empas" gi bandan dibe.  Guåha na ma sångan, "Maila' ya ta na' empas i dibi-ta." Yanggen hu dibe hao singkuenta pesos ya hu nå'e hao kuarentai nuebe ha', pues ti e'empas.  Lao yanggen hu nå'e hao tåtte ni singkuenta pesos, pues empas hit na dos.

På'go gi bandan isao.  Ennao i "empas isao," ti hita muna' fan e'empas i isao, na si Jesukristo chumåhlao i isao-ta.  Yanggen para u empas i isao-ta, debi di ta asi'e i prohimu-ta.  Yanggen ti ta asi'e i prohimu-ta, pues ti siña empas i isao-ta sa' klåro gi Saina-ta as Jesukristo na ha sångan, "Yanggen ti un asi'e i prohimu-mo, ni si Yu'us ti inasi'e i isao-mo.

Guåha na masusedi na yanggen un dommo' yo', pues hu dommo' hao tåtte, para un dommo' yo' ta'lo otro biåhe.  Lao siña ha' hu sangåne hao, "Cha'-mo, sa' empas hit!"  I Antigo na Testamento ha fanånå'gue hit nu i "Attadok pot åttadok, nifen pot nifen."  Lao annai måtto si Jesukristo, ha na' attrabisao ennao ya humuyong på'go i finanå'guen-ña, "Bendise ayo i mumatdise hao, tayuyute ayo i muna' lålåmen hao, cho'gue maolek para ayo i chumocho'gue i baba para hågo, guaiya i enemigu-mo."

I palåbra "empas" ma chuchule' ginen i fino' Españot "en paz," ni kumekeilek-ña "gi minahgong."  Yanggen gaige i dos taotao "en paz," kumekeilek-ña na esta ti mumumu i dos - pot dibe, pat pot isao pat pot otro na plaito.

No comments:

Post a Comment