GI ANNAI TÅYA' PÅLE'

amer-geo.com

ISLAN PÅGAN YAN I BOTKÅN

Depende gi håfa na såkkan, ginen guåha taotao ni mañåsåga gi san kattan na islas siha : Anatåhan, Sarigan, Alamågan, Pågan yan Agrigan.  Ya asta på'go guåguåha ha' masea unos kuåntos na taotågue ni mañåsåga guihe siha na isla.  Pot i man diddide' ha' siha na tinaotao, yan lokkue' pot i eskåsu guåha boti ni siña kumonne' kåttan pasahero, ofñan ha' na man binisita gi as Påle'.

Ennao mina' sumetmon si Påle' Lee gi taiguine na manera annai un biåhe humånao kåttan si Påle' para u atiende i mangilisyåno gi san kattan na islas :

"Magof yo' ni gaige yo' guine på'go gi entalo'-miyo.  Låstima sa' unos kuåntos biåhe ha' gi sakkan siña man binisita hamyo mågi nu i Pale'.  U ma'åse' mohon si Yu'us ya un dia u ta fan nahong Påle' giya Saipan, kosa ke siña hamyo man ma bisisita la-sesso.

Pot i tåya' guine Påle'-miyo, guåha siha na kosas nesesita todo i tiempo en hahasso ha'.  Chagi, fan, na todo i tiempo, en fan gagaige ha' gi estao i gråsia.  Yanggen chañapito si Yu'us en komete un makkat na isao, ensegidas sangåne si Yu'us na man mañotsot hamyo nu i en isague gue'.  Cha'-miyo fan mamaigo' gi puenge yanggen ti en tataitai i Fina'tinas Sinetsot : Asaina Jesukristo na Saina-ho...etc.

Yanggen guåha guine påtgon mafañågo, cha'-miyo fan maleleffa na ha nesesita ma takpånge yanggen mumalångo.  Chile' i hanom ya en atte i ilon i patgon, ya at mismo tiempo ålok : Guåho hu takpånge hao gi na'an i Tata, yan i Lahi-ña, yan i Espiritu Sånto.

Na' fan fiet hamyo gi tinaitai siha ni en iisa gi bonito na kapiyan-miyo.  Prokura fumanågue maulek i famagu'on-miyo nu i Katesismo.  Man isao hamyo yanggen ti en fanågue i famagu'on-miyo nu i dottrinan kilisyåno.

En lugåt di en fan man aligao espesiåt na penitensia, ofrerese si Yu'us nu i makkat na lina'la'-miyo guine komo penitensia.

Magåhet na tåya' Påle' sumåsåga gi entalo'-miyo, lao todo i tiempo man hahamyo yan si Yu'us.  Man pinipilan hamyo as Yu'us ha'åne yan puenge.  Na' fan fiet hamyo na famagu'on Yu'us yan Sånta Maria, ya siempre en fan binendise as Yu'us."