I LA TADDUNG NA FINIHO : MÅTTET

arthermitage.org

MÅTTET - annai un kastigan maisa hao, annai un mottifika hao pat un cho'gue håf na penitensia pot minalago'-mo ha'.

Kumuentos hame nigap yan un atungo'-ho ni fumaisen yo' håfa kumekeilek-ña "måttet," sa' ha hungok este ginen as tatå-ña.

Magåhet na ginen hu hungok este lokkue', lao pinat man åmko' ha' umu'usa este na finiho ya esta ti u åpmam para u falingo.

Måfåtto este na palåbra ginen i fino' lågo "mártir."  Ma chuchule' este ginen i fino' Grecia (i fino' Griego).  "Mártir" kumekeilek-ña "testigo."  I testigo munånå'e ebidensia pot i minagåhet un asunto pat sinisedi.  I mangilisyåno na man måttet munånå'e ebidensia na magåhet i hinenggen-ñiha sa' man magof siha man måtai pot i hinenggen-ñiha.  Ginen ayo na måfåtto i siknifikasion-ña i "mattet."

Pues håftaimano ma tulaika i siknifikasion-ña guato gi "i un kastigan maisa hao?"  Hasso nåya.  I man måttet i Gima'yu'us man ma puno'.  Enao i kastigun-ñiha yan i mottifikasion-ñiha.  Hita, ti siña ta puno' maisa hit sa' isao enao.  Lao siña ha' ta cho'gue masea håfa na klasen sakrifisio pat mottifikasion ni ti ha na' dådåño atdet i tataotao-ta.  Siña ha' hit mandimu åpmam na tiempo gi orasion.  Siña ha' ta utut palo gi kinano'-ta.  Siña ha' hit man åsson gi hilo' satge ya mungnga gi kåma.  Taiguenao nai siña ta fan måmåttet.

"Hafa si Juan na ti malago' chumocho?"
"Sa' mumåmåttet gue'."

Bonito para guåho este na fino' Chamorro, sa', masea ti seguguro yo' ya debi di hu fanguåddok mås, tåya' na hu hungok gi pumalo siha na råsa ma u'usa i palåbra "måttet" gi taiguine na manera - i para un kastigan maisa hao.