I disipulo siha man hånao ya ma sodda' ayo i man sinangåne as Jesus, ya ma kokonne' guato i patgon buliko, ma po'lo gi hilo'-ña i bestidon Jesus ya ma na' fatå'chong gue' gi san hilo'. Nai chåchågo' ha' trabia si Jesus giya Jerusalen, man etnon dångkulon linahyan taotao gi uriyå-ña, ma ågangñañaihon gue' yan man e'essalao en señåt de minagof. Unos kuåntos ha yuyute' i bestidon-ñiha gi edda', para u maloffan si Jesus gi san hilo'-ñiha. Palo siha man manuutut gi atbot siha påtmas yan råmos, ya i linahyan taotao man håhånao mamomokkat gi me'nå-ña yan i tatte-ña man ågang, "Hosåna nu i Lahen David! Bendito i Rai Israel, na mamaila' gi na'an i Saina!"
Gi entalo' i linahyan, man eståba palo fariseos, na pot enbidia yan chinatli'e-ñiha as Jesus man mandaddalalak yan man manespipia nu todo i pasusu-ña siha. Nai ma li'e este na minagof i sengsong, man nina' maipe ma agoddai-ñiha ya ilek-ñiha as Jesus, "Maestro, lalåtde i disipulu-mo siha." Lao man ineppe as Jesus, "Hu sangåne hamyo, na gin siha ini u fan mamatkilo, i acho siha u fanågang."
 |
| scpc.org.au |
No comments:
Post a Comment