HÅYE NA'ÅN-ÑA SI YU'US

Hu hungok este ginen as Peter J. Santos, sa' ha na' tungo' yo' si Jeremy Cruz

Un puengen Damenggo ha faisen yo' si bihu-ho kao humånao yo' para Eskuelan Påle' guihe na oga'an, oga'an Damenggo.

(One Sunday night my grandfather asked me if I went to catechism that morning, Sunday morning.)

Ilek-ña, "Ilek-ho na ti humånao hao."

(He said, "I say you didn't go.")

Hu oppe gue' tåtte, "Hunggan, Pop, humånao yo' para i Eskuelan Påle' på'go na oga'an."

(I replied back to him, "Yes, Pop, I went to catechism this morning.)

Pues ha faisen yo', "Pues håye na'ån-ña si Yu'us?"

(Then he asked me, "So what is God's name?")

"Yu'us nai, Pop."

("God, Pop.")

"Åhe'. Yu'us gue' lao håye na'ån-ña?"

("No. He is God, but what's His name?")

Ilek-ho, "Jesukristo."

(I said, "Jesus Christ.")

Ilek-ña, "Åhe'. Lahi-ña ayo. Lao håye na'ån-ña si Yu'us?"

(He said, "No. That's His Son. But what's God's name?")

Ilek-ho, "Hekkua', Pop, ti hu tungo'."

(I said, "Beats me, Pop, I don't know.")

Ilek-ña, "Annok nai na ti humånao hao para Eskuelan Påle."

(He said, "It shows that you didn't go to catechism.")

"Sa' yanggen humånao hao ya un atituye si Påle', siempre un tungo' håye na'ån-ña si Yu'us."

("Because if you went and paid attention to Father, you would surely know what's God's name.")

Ilek-ho, "OK, Pop. Pues håye na'ån-ña si Yu'us?"

(I said, "OK, Pop. So what's God's name?")

"Howard."

("Howard.")

Ilek-ho, "Howard? Haftaimano na Howard na'ån-ña?"

(I said, "Howard? How is Howard His name?")

Ilek-ña, "Ekkungok ha' si Påle'. Kada manaitai, ilek-ña, "Our Father who art in heaven, Howard be thy name."

(He said, "Just listen to Father. Every time he prays, he says, "Our Father who art in heaven. Howard be thy name.")

Eskuelan Påle' is known as Doktrina (or Lottrina) in the Northern Marianas