SEEING A SPIRIT

 

If you ever go into the jungle and see a spirit, here's a guide what to say, provided to us by Pedro, who was taught by his grandmother :

Sesso de humånao si Pedro gi halom tåno' manaliligao åmot pat håyo pat masea håfa, ya ti ma'å'ñao si Pedro achok ha' guiya ha' na maisa humånao.

(Pedro often went into the jungle looking for medicine or wood or whatever may be, and Pedro wasn't afraid even when he went by himself.)

Finaisen gue' as Kiko', i amigu-ña, "Kao tåya' na ma'å'ñao hao na siña hao manli'e' espiritu gi halom tåno'?"

(His friend Kiko' asked him, "Aren't you ever afraid that you might see a spirit in the jungle?")

Manoppe si Pedro, "Tåya', sa' ha fanå'gue yo' si nanå-ho biha håfa para bai ålok an siakåso na guaha håfa hu li'e'."

(Pedro answered, "Never, because my grandmother taught me what to say if I ever see something.")

Mamaisen si Kiko', "Håfa?"

("What?" Kiko' asked.)

Manoppe si Pedro, "Siempre bai ålok, 'Yanggen anite hao, pues hånao tåtte para sasalåguan!'

(Pedro replied, "I'll say, 'If you're a demon, then go back to hell!')

'Yanggen ånimas hao, bai tayuyute hao lao hånao tåtte para Putgatorio!'

('If you're a Poor Soul, I will pray for you, but go back to Purgatory!')

'Yanggen taotao hao, pues hånao tåtte para i gimå'-mo!'"

('If you're human, then go back to your house!')

Pues mamaisen si Kiko', "Lao håfa para un ålok yanggen ginen i langet na espiritu?"

(Then Kiko' asked, "But what will you say if it's a spirit from heaven?")

Ha hasso nåya si Pedro sa' tåya' håfa ilek-ña si nanå-ña biha pot ennao. Pues manoppe si Pedro, "Yanggen ginen i langet na espiritu, siempre bai ålok, 'Ayuda yo' sumodda' håfa hu aliligao!"

(Pedro thought a while because his grandmother said nothing about that. Then Pedro answered, "If it's a heavenly spirit, I'll say, 'Help me find what I'm looking for!'")