THE STORY OF CAIN & ABEL IN CHAMORRO

Si Adan yan si Eva meggai lalåhen-ñiha yan hågan-ñiha.  I finene'na siha si Cain yan si Abel.  Si Cain gumuåguålo', yan si Abel mamomoksai kinilo.  Guaha lokkue' este na diferensia entre i dos chume'lo : si Abel ha ma'añañaogue si Yu'us, si Cain åhe'.

Un dia, manofrese i dos chume'lo sakrifisio gi as Yu'us, kuentan agradesimiento pot i meggai na bendision ni ha resibe ginen i kannai Yu'us. 

Si Abel ha sakrifika i finene'na i patgon i ga'-ña gå'ga' siha, lao si Cain manofrese i tinekcha i atbot siha yan i produkton i tano'.

Magof si Yu'us nu i sakrifision Abel, lao ti magof as Cain.

Sumen layo' si Cain gi as Abel ya, gi fehman na binibu-ña, ha huchom i korason-ña kontra i che'lu-ña.

Sinangåne si Cain as Yu'us, "Pot håfa na un na' fehman i binibu-mo kontra i che'lu-mo?  Gin maulek mohon i fina'tinås-mo, hu sen guaiya hao pareho yan i che'lu-mo.  Lao tailaye i fina'tinås-mo, ya taiguennao gusise' u fåtto i kastigu-mo."  Lao si Cain ti ha atiende si Yu'us.

Otro dia, umasodda' i dos chume'lo ya kinembida si Abel gi as Cain para u siha i dos gi halom tåno', ya si Abel inosente må'pos ha'; ha dalalak i che'lu-ña, sin u hallum håf na tailaye, ya annai eståba esta i dos gi halom tåno', si Cain ha puno' i che'lu-ña as Abel.

Entonses ilek-ña si Yu'us gi as Cain, "Mångge i che'lu-mo as Abel?"

Manoppe si Cain, "Hekkua', ti hu tungo'.  Adda' guåho i pipulan i che'lu-ho?"

Si Yu'us ilek-ña nu guiya, "Håf fina'tinås-mo? I haga' i che'lu-mo kumåkåte a'gang ginen i edda' guine mågi giya Guåho.  Sa' pot hågo un na' gimen i tano' nu i haga' i che'lu-mo, ni ma chuda' pot i kanai-mo, hu matdise i tano' på'go kontra hågo.  Yanggen un tånme, ti un nina'e tinekcha, ya ti un tungo' para måno hao guato gi hilo' tåno' mientras låla'la' hao."

Ilek-ña si Cain, "Mampos dångkulo i isao-ho.  Bai hu hånao, ya bai hu atok gi me'nå-mo.  Ya kuatkiera ha' ni sumodda' yo', u puno' yo'."

Si Yu'us ineppe gue',"Ti u taiguennao!  Kuatkiera ha' ni pumuno' si Cain, bai hu apåse siette beses."  Ya ha po'lo si Yu'us un señåt gi as Cain, para tåya' ni uno na u sinedda' ya u pinino'.  Despues, humånao si Cain gi me'nan Yu'us, taisaga ya ti ha tungo' para måno gue' guato gi hilo' tåno'.

NOTA BENE

As in all proper names, I keep the original Spanish spelling, like Jose, Francisco and Maria.

So in this story of Cain and Abel, Cain is pronounced Ka - EEN, with the stress on the last syllable.  And Abel is pronounced Ah - BET, again with the stress on the last syllable.

I had to point that out since these two names are spelled the same in English and Spanish.